ഹോർമോൺ നുണ.
( വെറ്റിനറി ഡോക്ടറും ശാസ്ത്രഗവേഷകനുമായ ഡോ അരുൺ റ്റി രമേഷ് എഴുതുന്നു )
ഇറച്ചി കോഴിയെ ഹോർമോൺ കൊടുത്ത് ഭാരം കൂട്ടുകയാണ് വിശ്വസിക്കുന്ന ആരെങ്കിലുമുണ്ടെങ്കിൽ ദയവായി ഈ വസ്തുതകൾ മനസ്സിലാക്കണം, തിരുത്തണം.
* ബ്രോയിലർ കോഴിയിനങ്ങൾ പതിറ്റാണ്ടുകൾ നീണ്ട ജനിതക തെരഞ്ഞെടുപ്പിന്റെ ഫലമാണ്. കൂടുതൽ ആരോഗ്യമുള്ള, കൂടുതൽ വിളവ് തന്ന ചെടിയിൽ നിന്നുള്ള വിത്ത് അടുത്ത തലമുറയെ ഉണ്ടാക്കാൻ ഉപയോഗിക്കുന്ന കോമൺ സെൻസ് തന്നെയാണ് ജനിതക തെരഞ്ഞെടുപ്പിന്റെ അടിസ്ഥാനം. ലക്ഷക്കണക്കിന് കോഴികളെ വളർത്തി ഗവേഷണ പഠനങ്ങളുടെ അടിസ്ഥാനത്തിൽ സെലക്ഷൻ നടത്തുന്ന, ശാസ്ത്രീയമായ ഭക്ഷണക്രമവും പരിചരണവും നൽകുന്ന വ്യാവസായിക ഉൽപാദകർ അത് കൂടുതൽ കാര്യക്ഷമമായി നടപ്പാക്കുന്നു എന്നു മാത്രം.
* ഇറച്ചിക്കോഴികളുടെ വളർച്ചാ നിരക്കിനെയും തീറ്റ പരിവർത്തന ശേഷിയേയും നിർണ്ണയിക്കുന്നത് കോഴികളുടെ ഇനം, തീറ്റയുടെയും പരിചരണത്തിന്റെയും ഗുണനിലവാരം എന്നീ ഘടകങ്ങളാണ്. രണ്ട് ഉൽപാദകരുടെ ഇറച്ചിക്കോഴികളുടെ വളർച്ചാ നിരക്കിൽ വ്യത്യാസമുണ്ടെങ്കിൽ ഈ ഘടകങ്ങളിൽ ഏതെങ്കിലുമൊന്നിൽ വ്യത്യാസമുണ്ടാകണം.
* വളർച്ചാ ഹോർമോൺ ഒരു പ്രോട്ടീൻ ആണ്. അത് തീറ്റയിലൂടെ നൽകിയാൽ ആമാശയത്തിൽ വെച്ചു തന്നെ വിഘടനത്തിന് വിധേയമായും. ഹോർമോണിന്റെ half-life 20-30 മിനിട്ട് മാത്രമായതു കൊണ്ട് ഇഞ്ചക്ഷൻ ആയി നൽകുകയാണെകിൽ ദിവസത്തിൽ പല തവണ നൽകേണ്ടി വരും. ഹോർമോണിന്റെ വിലയും ഓരോ ദിവസവും പല തവണ ഇഞ്ചക്ഷൻ നൽകുന്നതിനുള്ള ചെലവും കണക്കാക്കിയാൽ കോഴിയുടെ വിലയേക്കാൾ കൂടുതലാകും.
ഹോർമോൺ കൊടുത്ത് കോഴികളിലെ വളർച്ചാ നിരക്ക് കൂട്ടുമെന്ന് പറയുന്നത് പഠനങ്ങളുടെ അടിസ്ഥാനത്തിലല്ല, അത് വെറും ഭാവന മാത്രമാണ്.
Comments
Post a Comment